Die onvergeetlike inskrywing
Vergeet gou van hierdie sin. Dink baie hard daaraan, draai drie keer in die rondte en vergeet dit. Laat dit heeltemal gaan.
Moeilik, né?
Die woordjie “vergeet” is een van die vreemdste verbums in Afrikaans (of enige ander taal, wat dit aanbetref). Dit word geklassifiseer as ‘n werkwoord, maar tree nie heeltemal so op nie. Daar is nie sprake van enige handeling nie – niks word uitgevoer of teweeggebring nie. Inteendeel, daar is ‘n absolute afwesigheid van enige aksie hoegenaamd. Anders as meeste ander verbums (dink aan “retireer”, “fnuik”, “voeter”, “slier”) dui “vergeet” nie op aksie nie. Dis ‘n verlies aan die funksies van werkwoorde soos “onthou” of “byval”. Dis nie handeling nie, maar die afwesigheid van handeling.
Jy kon nie die heel eerste sin van hierdie inskrywing vergeet nie, want om iets te vergeet, vereis dat jy nie daaraan dink nie (of ‘n hou teen die kop). Om iets te lees is tog om daaraan te dink. Dis onjuis om iets bewustelik te probeer vergeet, want “vergeet” is ‘n onwillekeurige proses, sonder intensie of bybedoelings.
Dus: huiswerk. Vergeet van hierdie inskrywing. Sodra jy dit regkry, kom terug en vertel ons daarvan.
(Ek raai “vergeet” tree meer op soos “wees” of “bestaan”, wat eerder ‘n toestand as ‘n aksie aandui. Dit word egter nie soos laasgenoemdes gebruik nie en pas in elk geval beter saam met naamwoorde soos “mitose” of “kondensasie”, wat op prosesse dui.)
Wat nou weer? Nee, ek sal dit nie nou regkry nie, maar is is seker is sal binne die volgende dag of week.
Reply
“Rustig kyk by die klaskamer se venster uit n droom oor sy vakansie wat voorle!”
Gelukkig het ek kort geheue.
Reply
Ek het ‘n goeie vriend wat sê dat alle geheime by hom veilig is want teen die volgende dag het hy vergeet wat jy vir hom gesê het.
Reply
Ag deesdae raak my kop in elk geval soos ‘n sif, hy vergeet alles… wonder of ek oor die ouderdom moet begin bekommer
Reply
Natuurlik as mens kom vertel oor die vergeet het jy weer onthou…
Reply
Jy lees duidelik nie genoeg Freud nie.
Reply
Hmm…maar repressie is tog ook onbewustelik? Of waarna verwys jy?
Reply
Moet ons ‘n petisie opstel om “vergeet” vanaf ‘n werkwoord na ‘n “naamwoord” te laat verander?
Ek sou nie die eerste ding weet van watter woorde as wat geklassifiseer word nie, en juis daarom skryf ek seker soms gebrekkige sinne. Maar nogtans skryf ek. So wie presies besluit nou weer watter woorde is wat?? Kom ons doen daai petisie of spot jy net met dommes soos ek?
Reply
Hehe nah, hierdie is nie spot nie. Die wonderlike ding is dat ons breine mooi verstaan wat om met hierdie effe onvanpaste begrip te maak.
Reply
(ek ‘n paar leksikograwe gaan my in elk geval mooi die leviete voorlees hieroor
)
Reply
Onbewustelike handeling is nog steeds handeling.
Reply
Hmm…in daardie geval kan repressie wel handeling wees. Vergeet is egter (sover my kennis strek) ‘n biologiese proses van aftakeling. Freud se idees het steeds ‘n baie prominente subjek wat bewustelik of onbewustelik handel, maar in die geval van ‘n biologiese aftakeling dink ek nie kan daar selfs van onbewustelike handeling gepraat word nie. Ek raai dis soortgelyk aan kanker of ‘n hartaanval wat ‘n mens nie bewustelik of onbewustelik kan wil nie. Dit gebeur bloot op ‘n biologiese vlak, of jy nou daarvan weet of nie.
Maar ek praat onder korreksie. As jy iets meer weet, luister ek graag
Reply
Van die biologiese prosesse weet ek min. Maar soos ek dit verstaan, vergeet die brein nooit nie. Dit skuif net inligitng na plekke toe waar dit moeiliker is om te bereik. Dis hoekom mens deur hipnose regressie kan bewerkstellig.
Ek dink die onderbewussyn werk redelik hard om goed weg te skuif wat dit nie like nie.
Reply
…ek wou iets profounds sê… maar het vergeet wat dit was…
Reply
knersis – teehee
Leon Jacobs – hmm…lyk my ek kan tog nog ‘n bietjie gaan lees. dankie vir die noem van freud.
Reply