Ek verstaan nooit lekker hoekom mense op straathoeke staan en preek nie, maar vandag was daar weer twee banierswaaiers by die voetoorgang voor die Opvoedkundegebou. En daar staan Renier toe weer:
…met sy plakkaat:
(Let op die boom in die agtergrond)
…en vertel mense passievol (nie manies nie – hierdie ou gee regtig om) dat hulle hul sondes moet bely. Hier en daar het 'n groepie studente belangstelling getoon, maar die meeste het ongemaklik of geïrriteerd verbygeloop. Hoekom doen hy dit?
Want hy is lief vir mense. Hy woon in die Strand (sy “fellowship” is ook daar) en werk by Shoprite se hoofkantoor, maar soms neem hy 'n dag by die werk af en kom staan tussen die studente met baniere. Hy probeer hulle bekeer, maar dwing niemand nie. Hy is nie skaam vir sy boodskap of bang vir die son nie.
Toe ons klaargepraat is, gee hy vir my 'n kaartjie. Die voorkant lees: “Get out of HELL free card (A limited offer: over for details”. Die agterkant som sy teologie vir my in 11 versies op: “Daar is net een God en daar is een groot plan – maar die plan het 'n klein probleem met 'n massiewe oplossing. Daar is net twee paaie. Wegkomkans is daar nie. Daar is min tyd en die keuse is joune – kies Christus en erf die ewige lewe of verwerp Christus en brand in HEL” [vrylik vertaal]. Daar is selfs 'n skakel na 'n webtuiste: www.timeforchrist.org
Wragtig – daar is Renier toe sommer op die webtuiste ook. “Bro Renier preaches on the train to Cape Town”:
Kan jy nou meer.
Die afgelope paar maande het ek van meet af besluit hy’s die kluts kwyt. Vandag het ek met hom gaan praat. As jy ooit die trein na Kaapstad neem of in die strate van Stellenbosch rondloop en vir Bro Renier sien, groet hom gerus vriendelik. Hy sal jou vriendelik teruggroet.
Ek dink nog steeds hy’s verkeerd, maar terwyl ek weggestap het met die kaartjie, was daar net een gedagte in my kop: wie de joos is ek om hom te veroordeel?