Ek betoog vandag voor julle as die stem van Rede en vra dat ons die abominasie genaamd “regering” van die aardbol sal afvee.
Julle mag dalk geskool wees in die antieke geskrifte van mal ou ooms soos Hobbes en Locke – julle mag dalk dink dat die natuurstaat een is wat ten alle koste vermy moet word, dat ons regerings nodig het, maar ek sê vandag vir julle: ons moet regerings wortel en tak uitroei, want dit veroorsaak niks minder as lyding en verdriet nie! Sedert die ontstaan van die vroegste statstate ongeveer 5000 jaar gelede het regerings hulself gevestig as 'n nimmereindige bron van irrasionaliteit en onderdrukking.
Regerings alleen is verantwoordelik vir die meeste moorde wat tot op hede deur die mensdom gepleeg is. Die tweede wêreldoorlog alleen was verantwoordelik vir 72 miljoen sterftes, die eerste een 59 miljoen, die Mongoolse veroweringe het 60 miljoen lewens gekos, die An Shi rebellie 33 miljoen en die Taiping rebellie 30 miljoen. Op eie bodem het Shaka as koning van die Zulu’s 2 miljoen mense uitgewis en was Apartheid talle mense se lepels in die dak. Om nie te praat van die ongebreidelde hebsug en die onregte van kolonialisme nie. (En dis nie eers 'n fraksie van alles wat in die afgelope paar millenia gebeur het nie.)
Dink Alexander die grote. Dink Julius Caeser. Dink Napoleon. Dink George W. Bush. Dink miljoene der miljoene mense sinneloos dood deur die jare – en vir wat?
Vir die groot Leviatan in die lug?
“Ja,” sê julle dalk, “maar die regering pas ons op. Die regering laat ons veilig voel en beskerm ons teen die kwade”. Snért! Seg ek. Kan julle nie sien hoe blind julle is vir die grootste onreg van alle tye nie? Regerings is 'n bastion van lyding wat irrasionaliteit laat seevier! Regerings skree Rasionele denke dood!
Regerings. Respek? Ridikuul!
Kan julle sien hoe absurd hierdie soort argument eintlik is?