Met apologie aan Emil Jung
Soos voorheen genoem, werk ek bedags op 'n Apple Mac. OSX is steeds nie vir my te watwonders nie (hoewel ek exposé nogal in Windows 7 sal waardeer) en die peperduur Cinema Display se staander kan nie eers die skerm se hoogte verstel nie. Dit bring mee dat ek my nek teen vreemde hoeke moet buig om werk gedoen te kry of Kollega A (hy eet appels) se gerieflike houtstaandertjie moet gaps:
Kollega A is 'n aangename mens, so dit laat my met 'n seer nek. Dis egter nie al nie – aan die einde van elke dag sit ek ook met seer vingers.
Sien, nog iets wat Apple nalaat om klante te vertel, is dat hulle muise van die mees ongemaklike toestelle op aarde is. Dis plat, wit en baie plasties – en dit pas nie juis in die natuurlike kurwes van 'n hand nie. Bowenal is dit moeilik om bloot daarmee te klik. 'n Aansienlike hoeveelheid krag word vereis om die muis se enkele knoppie af te druk. Trouens, dit ís 'n knoppie:
Die probleem?
Apple se bedryfstelsel, sowel as baie van die programmatuur wat daarby verpak word, vereis dat jy gereeld moet regsklik. In plaas daarvan om jou middelvinger te gebruik soos Moeder Gates dit bedoel het, moet jy jou ander arm al die pad na die sluitelbord beweeg (wat vir Kollega A 'n onoorbrugbare probleem skep, aangesien hy moontlik 'n appel in sy linkerhand kan hê) en CTRL inhou terwyl jy die harde, onvriendelike muisknop moet pers met elke krieseltjie krag in jou vingers.
Daarom lyk die punt van die Microsoft-muis wat ek agter uit die ateljee gekrap het se draad tans so:
En die Apple klikgewas s’n so:
Myns insiens is dit bloot nog 'n voorbeeld van Apple wat die planeet breinponkie om meer te betaal vir uiters gemiddelde produkte. Kyk byvoorbeeld hoe besing hulle die lof van die Mighty Mouse:
In the beginning, there was one button. Then there were two. Then there were clickable scroll wheels and programmable toggles and solid-state slides. But nobody made a mouse as easy to use as your Mac. Until now. Mighty Mouse combines the capability of a multibutton mouse with Apple’s signature top-shell design for the best of both form and function. Use it any way you work: Stick with single-button simplicity or click with multibutton efficiency.
Vertaling: Ons het 'n muis gemaak met presies dieselfde funksies as enige ander muis op aarde en, desnieteenstaande die feit dat ons muis presies dieselfde as jou muis kan doen, is ons s’n makliker, meer divers en beter om te gebruik. Want ons sê so.
Blik op realiteit: Dis 'n oorgewig, harde, ongemaklike stuk plastiek met (in die geval van die draadlose weergawe) swak tracking speeds en 'n buitensporige prys. R769 vir iets wat in die drom hoort.
WTF.