As al die geraas daaroor uitgedoof word, is die enigste strukturele verskil tussen Web 1.0 (die internet soos ons dit tien jaar gelede geken het) en Web 2.0 (implisiet ook sosiale media) dat gebruikers data kan upload sowel as download. Niks meer nie, niks minder nie. Derhalwe: in 1999 was die internet 'n netwerk waarmee mense na inligting kon soek. Wanneer hulle hierdie inligting opgespoor het, het hulle daarna gekyk.
Eenvoudiger gestel: nadat mense 'n webblaaier gebruik het om HTML-inhoud deur middel van die HTTP-protokol na hul rekenaars te kopiëer, het hulle webblaaiers gebruik om nog HTML-inhoud via die HTTP-protokol na hul rekenaars te kopiëer.
Die sogenaamde sosiale media-revolusie is in wese maar 'n omgekeerde toevoeging tot hierdie proses. Binne die kader van Web 2.0 (self 'n taamlike vae konsep) spoor mense nie net inligting op om na te kyk nie, maar skep hulle self ook inhoud waarna ander mense kan kyk. Eenvoudiger gestel: hulle gebruik webblaaiers om inhoud wat via HTML besigtig moet word deur middel van die HTTP-protokol na ander rekenaars te kopiëer.
Dis dit. Data uploaded, data downloaded.
Met hierdie brokkie kennis tot 'n mens se beskikking, is dit ietwat amusant wanneer mense liries raak oor hoe Twitter “die toekoms is”, hoe Google Wave die wêreld “heeltemal gaan verander”, hoe Facebook ons “lewens gaan oorneem” en die sosiale media-revolusie sommer die hele wye wêreld vir goed beter gaan maak. Dit raak dan die onkundige gebabbel van ‘n legioen leke wat versiersuiker rondom rudimentêre tegnologie pleister.
Dis net uploads, n00bz. Srsly.