Moontlik verwante inskrywings:

1. Lianie May Fokofpolisiekar van die verhoog af
2. Daniël François Malan vs Fokofpolisiekar

As ons nou hier in die saal af 'n ry pale sou plant, tien pale, om die laaste tien jaar voor te stel, en aan elke paal 'n merk sou maak op 'n hoogte van die vloer af ooreenkomende met die betreklike skryfgebruik van Afrikaans in die respektiewe jaartal, en 'n streep deur die merke trek van die eerste af hier naby die vloer tot by die laaste daar anderkant teen die solder, dan sou die streep 'n snelstygende boog beskryf, nie net vinnig opgaande nie, maar opgaande na 'n vinnig vermeerderende rede. Laat ons nou in ons verbeelding die boog verleng vir die tien komende jare van nou af. Sien u menere waar die punt sal wees, daar buite in die bloue lug hoog oor Bloemfontein, in die jaar 1924.

Luister jou Kurt Darren, luister jou Fokofpolisiekar, luister jou Insek. Moet mekaar om hemelsnaam net nie dwing om dit ook te doen nie, anders gaan ons almal oor 'n paar dekades saam onder 'n maatemmer vrot. Niemand het nog ooit daarby baatgevind om in die verlede te leef nie; met ons s'n is dit veral sinloos om so te maak.

Leef en laat lewe.

(En wee bemarkers wat goedkoop fluff opdis asof die teendeel waar is.)

Moontlik verwante inskrywings:

1. Die tweede waarheid oor die Afrikaner
2. Die derde waarheid oor die Afrikaner…
3. Jy’t baie gebou, liewe Afrikaner #105429, liewe Afrikaner #2121032, liewe Afrikaner #43432…

Kan iemand dalk 'n god bel
En vir hom se ons het hom nie meer
Nodig nie

Impliseer nie dat die antwoord op die kwessie van God se bestaan gelyk is aan: “daar is geen God nie”. Dit sê bloot: of daar so Iemand is of nie – ons het hom nie meer nodig nie. Dis 'n baie eiesoortige verwoording van die spreker(s) se eie spirituele ervaring(s).

Wat my fassineer is hoe die kerk daarmee op hol gegaan het.

“Hoe durf hulle?”

Dit was die verontwaardigde vraag wat die kerk en haar makkers meestal gestel het. Ironies, natuurlik, want spirituele belewenisse is iets intens persoonlik – iets wat nooit identies is van persoon tot persoon nie. Jou God is nie die siel langs jou se God nie en sal dit nooit wees nie – al sif julle hoe lank deur belydenisgeskrifte, al doen julle hoeveel rituele saam, al doop julle voor 'n doopfont of in die Ganges.

Dalk moes die kerk eerder jubel oor die woorde wat Francois van Coke gil.

Dalk is dit orraait as iemand nie 'n God soek nie, net soos wat dit orraait is as iemand wel 'n God soek.

Dalk pas 'n spirituele ervaring nie altyd in 'n formulier nie.

Moontlik verwante inskrywings:

1. Soek en jy sal vind
2. Soek die vrou en wen ‘n Datsun
3. Hoe om met jouself te speel (in Drop D)

waaaaaaant! jy! soen! my! nie! meeeeer! nieeee!

Lianie May, die sangeres bekend vir die treffer: “Jy soen my nie meer nie”, het na bewering verlede Sondag tydens 'n Kerskonsert knertsdronk (ek het lank en diep hieroor gedink, en uit die ganse Afrikaanse leksikon is dit die beste woord) op 'n verhoog by 'n Kerskonsert verskyn, vals gesing en onsamehangend gebabbel. Só erg was haar vertoning dat bykans 800 toeskouers dit vroeg verlaat het.

Dis 'n netjiese illustrasie van hoe relatief moraliteit soms kan wees.

As dit Fokofpolisiekar of Ef-El was wat so opgetree het, sou hul aanhangers nie juis omgegee het nie. Dis deel van die vertoning. Braak 'n bietjie hier, vloek 'n bietjie daar – niemand (behalwe dalk Allan Boesak of Oudtshoorn se kerkleiers) gaan hulle kruisig nie. Laat May egter net 'n voet skeef sit in 'n dubbele ry spore en haar aanhangers loop teleurgesteld weg. Waar Fokofpolisiekar se aanhangers aan die einde onder mekaar sal koer oor hoe “befok” die vertoning was, sal May s’n brommend verdwyn en binnensmonds (want dis ongeskik om dit hardop te uiter) mor oor hoe dronk sy was. Ironies genoeg sal sommige van hierdie ontstigte gehoorlede “erger” dinge aanvang by 'n naweekbraai en dit dan 'n “lekker kuier” noem.

Dieselfde alkohol, verskillende uitkomste.

Wat is dit wat maak dat May preuts moet wees, maar Fokofpolisiekar nie?

Moontlik verwante inskrywings:

1. Daniël François Malan vs Fokofpolisiekar
2. Van Coke se stem aan bande gelê
3. Fokofpolisiekar. Dis ‘n adjektief.

‘n Vlugtige flirtasie met my rekenaar en die blogosfeer die afgelope sewe minute (regtig, ek het tydgehou), het my van 'n LitNetseminaar oor Wopko Jensma tot by Van Coke Kartel se Myspaceprofiel geneem – wat my ore outomaties na hul nuutste treffer “27 Kluisenaar” geneem het.

En good grief, Francois se stem is besig om te gaan.

Ek het Die Bende lanklaas op 'n verhoog gesien (by die KKNK laas, om presies te wees). Toe ek hulle onlangs in Stellenbosch gaan kyk het, kon ek nie anders as om effe teleurgesteld daar weg te ry nie. Nie in die musiek nie – die vertoning was oudergewoonte topklas. Ek was teleurgesteld in Francois van Coke. Aan die einde van die vertoning was dit duidelik dat hy nie meer kon sing nie. Sy stem het plek-plek weggeraak en hy het die gehoor al hoe meer kans gegee om sy woorde te sing – iets waaroor hulle heel ironies gaande was.

As jy altemit 'n aanhanger is, gaan krap rond in jou CD-versameling en luister na “Maak of Braak” – 'n treffer van hul eerste album. Die toonaard is E-majeur – en Francois se stem klink taamlik suiwer. Luister nou na “27 Kluisenaar”. Daar is 'n duidelike rasperkwaliteit in sy stem; dit klink nou asof hy die meeste hoë note moet uitforseer. “27 Kluisenaar” is in C-Majeur. Dis vier halftone laer as “Maak of Braak”.

Dis bedoel om makliker te wees.

Of dit nou met opset so klink of nie – hierdie ou se stem is besig om baie vinnig baie ver agteruit te gaan. Gerugte (die GormenDIzer Media Eenmanskap het sy bronne) het dit juis dat hy maandeliks kortisooninspuitings kry om aan die sing te bly.

En dis gevaarlik.

En dis hartseer.

En dis hoekom ek teleurgesteld was.

En nou wend ek myself weer tot merkwerk.

Moontlik verwante inskrywings:

1. Stem Ponie! (Ten bate van Frank)
2. Vir wie sou jy stem?
3. Gaan Van Coke my oordromme kartel?