Ek wil myself verstout en sê dat die antwoord eenvoudiger is as wat baie mense dink. Dit behels nie eers groot woorde nie.

Die antwoord is Kurt Darren en die Huisgenoot.

Huisgenoot is vandag steeds die tydskrif in Suid-Afrika met die hoogste sirkulasiesyfer in die land. Tog is die teikenmark 'n minderheidsgroep. So ook is die geval met Kurt Darren: in 2009 was hy die vermaaklikheidskunstenaar wat die meeste CD’s in Suid-Afrika verkoop het. (Trouens, die top vyf verkopers was Afrikaanse sangers.)

Tydskrifte en CD’s is luukshede. As 'n bevolkingsgroep tydskrifte en CD’s kan bekostig, is hulle ekonomies nie te sleg af nie. As hulle boonop nog voorheen bevoordeeld was en steeds jaar na jaar verantwoordelik is vir die land se topverkopers, dan is Suid-Afrika nog lank nie ekonomies getransformeer nie.

Die dag wat Huisgenoot nie bo-aan die land se top-10 tydskrifte is nie en Kurt Darren en kie onbenullige sangers met middelmidate verkoopsyfers is, sal die dag wees wat Suid-Afrika volledig getransformeer is.

Moontlik verwante inskrywings:

1. Kurt Darren en die AWS
2. Kurt Darren is ryk want Kurt Darren werk
3. Oop brief aan Kurt Darren

Ek kan nie glo Manto moet alweer 'n nuwe lewer kry nie. Dis sommer belaglik, man – ek weet sommer klaar sy gaan prioriteit kry bo al die arme VIGS-wesies en ou tannies en tieners wat ook lewers nodig het, maar nie soveel geld soos sy het nie. Moet sy nou wragtig 'n nuwe lewer kry net omdat sy kwansuis belangrik en ryk is? Dis belaglik, man! Hierdie land gaan ten gronde!

Persoon X in gesprek B

Vinnig! Dek die tafel! Kurt DARREN is in die restaurant! Prop daai paartjie by die hoektafeltjie met die see-uitsig nader aan die agterkant en vee die tafel skoon! Dek die blink, nuwe eetgerei! Sit sommer 'n nuwe tafeldoek ook op! Vinnig, hier kom hy! KOM, MOVE IT, JANNEMAN! MOVE! Hy gaan GROOT geld spandeer, hy’s ryk! Wees vriendelik! Onthou om te glimlag! DIS KURT FRIKKIN DARREN!

Moontlik verwante inskrywings:

1. Die dag wat Kurt Darren onbenullig is
2. Kurt Darren en die AWS
3. Kurt Darren is ryk want Kurt Darren werk

Subliem.

Hat tip: Henno.

Moontlik verwante inskrywings:

1. Straatligkinders skyn heilig(sic)
2. Amor! Span! Die! Seile!
3. Bars, borrel, bars

As ons nou hier in die saal af 'n ry pale sou plant, tien pale, om die laaste tien jaar voor te stel, en aan elke paal 'n merk sou maak op 'n hoogte van die vloer af ooreenkomende met die betreklike skryfgebruik van Afrikaans in die respektiewe jaartal, en 'n streep deur die merke trek van die eerste af hier naby die vloer tot by die laaste daar anderkant teen die solder, dan sou die streep 'n snelstygende boog beskryf, nie net vinnig opgaande nie, maar opgaande na 'n vinnig vermeerderende rede. Laat ons nou in ons verbeelding die boog verleng vir die tien komende jare van nou af. Sien u menere waar die punt sal wees, daar buite in die bloue lug hoog oor Bloemfontein, in die jaar 1924.

Luister jou Kurt Darren, luister jou Fokofpolisiekar, luister jou Insek. Moet mekaar om hemelsnaam net nie dwing om dit ook te doen nie, anders gaan ons almal oor 'n paar dekades saam onder 'n maatemmer vrot. Niemand het nog ooit daarby baatgevind om in die verlede te leef nie; met ons s'n is dit veral sinloos om so te maak.

Leef en laat lewe.

(En wee bemarkers wat goedkoop fluff opdis asof die teendeel waar is.)

Moontlik verwante inskrywings:

1. Die tweede waarheid oor die Afrikaner
2. Die derde waarheid oor die Afrikaner…
3. Jy’t baie gebou, liewe Afrikaner #105429, liewe Afrikaner #2121032, liewe Afrikaner #43432…

Vaagweg, dalk?

Ondanks Randal Abrahams se verbale aanslae het elkeen van hulle op 'n tydstip Idols Suid-Afrika gewen – en almal het van hulle vergeet. Hoewel elkeen 'n mate van kommersiële sukses bereik het (veral Heinz Winkler, wie se albums goed verkoop en op die klankbaan vir Disney se Treasure Planet te hoor is), is hulle jare ná die kompetisie steeds nie die supersterre wat die program beloof om te skep nie. Nie in die oë van die Suid-Afrikaanse publiek wat vir hulle gestem het nie, in elk geval.

Dis tog hoekom mense aan die program deelneem, is dit nie? Hulle is lief vir musiek en kan miskien 'n hond uit 'n denneplantasie sing, maar bowenal soek hulle roem. (As dit 'n geval van l’art pour l’art was, sou niemand tog getraak gewees het met televisieverskynings en volgeboekte toere nie.) Hoekom kry wenners dit dan nie?

Die groot trekpleisters by kunstefeeste en ander groot vertonings is steeds die “ou hande” in die bedryf van ligte popmusiek – Kurt Darren, Laurika Rauch, Chris Chameleon, Steve Hofmeyr. Almal wat hulle agterstewes self vir jare flenters gewerk het. Die jong name wat wel by hierdie geleenthede optree, val in dieselfde kategorie as die Idols-wenners – hulle is nou gewild, maar oor 3 jaar twyfel ek of hulle almal steeds “supersterre” sal wees wat groot konsertsale met gillende gehore vul.

As ek 'n raaiskoot moet waag, is die rede hiervoor 'n eenvoudige paradoks wat in Idols opgesluit lê. Dit kweek nie 'n superster nie: dit kweek die volgende superster. Volgende. 'n Nuwe een. 'n Weggooibare produk. Dit trek duisende deelnemers met (super)sterre in hul oë en belowe hulle roem tot in alle ewigheid++, maar produseer daarenteen kitswenners wat eintlik maar net gewild is tot die volgende een die (kortstondige) troon bestyg.

Harde werk – dis al wat werklik vrugte sal werp. 10 000 ure se harde werk. Bloedsweet in klein klubs, moeilike bestuurders, volgelaaide Ventertjies en leë sale op klein dorpies. Dit behoort eintlik vanselfsprekend te wees, maar jaar op jaar breinponkie televisiestasies ons om die teenoorgestelde te glo.

Dis clichématig, maar dis waar – die beste kommersiële musikante is dié wat eens op 'n tyd skaamgekry het vir hul venues.

Moontlik verwante inskrywings:

1. Die dag wat Kurt Darren onbenullig is
2. Oop brief aan Kurt Darren
3. Kurt Darren en die AWS