Johan Swarts » RSG

Driehoek & Sirkel – Episode 6 (Feel it)

Johan Swarts — Mon, 14 Jun 2010 12:30:31 +0000

RSG-omroepers sukkel hulself vir die afgelope paar weke half besimpeld om die frase: “Feel it – it is here!” vir 'n radio-advertensie uit te spreek. Driehoek, heel toevallig, ook:

Viel iet.

It is down by the mountain side.

Moontlik verwante inskrywings:

Sintaksisversie vir die week [Die Groep]

Johan Swarts — Tue, 24 Nov 2009 07:30:00 +0000

Jy moes nou die dag wéér daardie onbesonne advertensie op RSG vir die mobiele intekendiens aanhoor, né? Daardie een waar jy kan klets! en Bybelversies aflaai! teen R[(die prys van jou siel) * (die prys van jou huislening)^(die prys van jou mees onlangse bydrae in die kollektebordjie)].

Die korporatiewe plastiekspiritualiteit het jou kop onwillekeurig agter jou voertuig se stuurwiel laat skud, né?

Ja?

Wel, wees nie bevrees nie! Want kyk: ek bring aan jou 'n weeklikse sintaksisbrokkie! Jy kan daarmee klets! En morfeme uit gelede woorde in Bybelversies onttrek! En dis alles gratis! Wat 'n wonderbaarlike Sintagmafees! Groepe met uitroeptekens!

Taalkunde bestudeer dikwels een van drie areas: Fonologie (klank), Grammatika (struktuur) en Semantiek (betekenis). Sintaksis val onder Grammatika. Die eenheid van ondersoek in die Sintaksis is die groep. Volgens Ponelis (1968:5) kan die groep omskryf word as 'n eenheid van woorde waarvoor daar bepaalde volgordereëls geld. Afrikaanse sintaksis stipuleer byvoorbeeld dat die groep:

die vinnige mot

nie soos volg geskryf kan word nie:

die mot vinnige

Die groep moet nie met die sin verwar word nie. Waar die groep 'n sintaktiese eenheid is wat primêr deur woordvolgorde bepaal word, is die sin 'n eenheid “wat deur intonasie as 'n voltooide geheel gekenmerk” en geïsoleerd gebruik kan word (Ponelis 1968: 5).

Uit Ponelis, F. 1968 Grondtrekke van die Afrikaanse sintaksis (Vierde druk). Pretoria: J.L van Schaick Bpk.

Sien? Jy voel al reeds beter.

Moontlik verwante inskrywings:

My seun soek werk

Johan Swarts — Tue, 19 May 2009 21:52:23 +0000

Omdat ek in die bevoorregde (soms vervloekte) posisie is om 'n werk en 'n tesis te probeer balanseer en ek sommige dae in Kaapstad werk, is ek soms laat in die aand op die pad terug Stellenbosch toe. So het dit gebeur dat ek heel gereeld laataand-RSG begin luister het. Die laataand-program op Dinsdae, aangebied deur LiMari Louw, heet “Deurnag” en het die volgende skedule:

00:00 Nuus
00:02 Werksoek
01:00 Middagvervolgverhaal (herhaling)
01:15 Insimbi (herhaling)
01:30 Inbel en musiek
02:00 Bepeinsing (herhaling)
02:05 Taaltemmer (taalvasvrae)
03:00 U eie keuse (herhaling)
04:00 Musiek

Genadiglik is ek normaalweg darem voor 01:00 by die huis (eendag as ek groot is, sal ek inbel vir “Taaltemmer”), maar dis die 00:02-gleuf – “Werksoek” – wat elke aand my aandag trek.

Soos die naam suggereer, is dit 'n segment waartydens mense kan inbel, SMS of e-pos om werk aan te bied of te soek. Die meeste inbellers soek (gewoonlik dringend) werk en dit breek my soms nogal om te hoor hoe desperaat hulle is.

Iets val 'n mens later by.

Die meeste mense wat inbel, is nie werklose mense nie.

Dis hulle ma’s!

“Hallo, my naam is Tant X van Y en…ag…ek bel namens my seun / kleinseun. Hy soek dringend werk en hy is bereid om enigiets te doen.”

Waarop 'n mens wil antwoord: “…soos om self die telefoon op te tel en te bel?”

Ek besef al te goed dat dit laag en gemeen is om te spot met mense wat nie werk het nie (ek beplan ook nie om dit te in hierdie inskrywing te doen nie, want ek dink regtig dis laakbaar). Maar wragtig – hoe op dees aarde verwag jy iemand moet vir jou werk gee as jy nie eers self die moeite wil doen om dit te soek nie?

Stuur hulle hul ma’s na die onderhoude ook?

Moontlik verwante inskrywings: